Edward, Edward

Modern English Version

"Quhy dois your brand sae drop wi' bluid,
Edward, Edward,
Quhy dois your brand sae drop wi' bluid,
and quhy sae sad gang yee, O?"

"O I have killed my hauk sae guid,
Mither, Mither,
O I have killed my hauk sae guid,
And I had nae mair bot hee, O."

"Your haukis bluid was nevir sae reid,
Edward, Edward,
Your haukis bluid was nevir sae reid,
My deir son I tell thee, O."

"O I hae killed my reid-roan steid,
Mither,Mither,
O I hae killed my reid-roan steid,
That erst was sae fair and free, O."

"Your steid was auld, and ye hae gat mair,
Edward, Edward,
Your steid was auld, and ye hae gat mair,
Sum other dule ye drie, O. "*

"O I hae killed my fadir deir, 
Mither, Mither,
O I hae killed my fadir deir,
Alas and wae is me, O."

"And quhatten penance wul ye drie for that,
Edward, Edward,
And quhatten penance wul ye drie for that
My deir son, now tell me, O."

"Ile set my feit in yonder boat,
Mither, Mither,
Ile set my feit in yonder boat
and Ile fare ovir the sea,O."

"And Quhat wul ye doe wi' your towirs and your ha',
Edward, Edward,
And Quhat wul ye doe wi' your towirs and your ha',
That were sae fair to see, O?"

"Ile let them stand til they doun fa',
Mither, Mither,
Ile let them stand til they doun fa',
For here nevir mair maun I bee, O."

"And quhat wul ye leive to your bairns and your wife,
Edward, Edward,
"And quhat wul ye leive to your bairns and your wife,
Quhan ye gang ovir the sea, O?

"The warldis room let thame beg throw life,
Mither, Mither,
The warldis room let thame beg throw life,
For thame nevir mair wul I see, O."

"And quhat wul ye leive to your ain mither deir,
Edward, Edward,
And quhat wul ye leive to your ain mither deir,
My deir son, now tell me, O?"

"The curse of hell frae me sall ye beir,
Mither, Mither,
The curse of hell frae me sall ye beir,
Sic counseils ye gave tae me, O."